COUNTER-COUP SA SENADO, IBINASURA NI LACSON: ‘FAKY BREAKY NEWS’

Ni Ernie Reyes


Ito ang paglalarawan ni Senate President Pro Tempore Panfilo “Ping” M. Lacson nitong Linggo ang isang diumano’y “Breaking News” post na nagsasabing may pagbabago na naman sa pamunuan ng Senado.

“Peke. Intended to deceive and confuse. Underestimating the intelligence of the new Senate majority bloc, nagba-baka sakaling may tumalon at magpirma,” ani Lacson hinggil sa post.

“Malevolent, underhanded, foul and desperate. Kung may song na ‘Achy Breaky Hearts’, eto naman – ‘Faky Breaky News’,” dagdag niya.

Ang tinukoy niya ay ang post ng “OneTV Philippines” na lumabas 9:12 PM noong Sabado. May caption ito na “BREAKING: Another Regodon (sic) in the Senate?” at nagsabing nakakuha ng numero si “Senate Minority Leader Allan (sic) Peter Cayetano” para maging Senate president, ayon sa “reliable source” ng “OneTV Philippines.”

Sa Facebook page ng “OneTV Philippines,” ito ay isang “Digital News Network Globally-Based in Davao City and Pagadian City” na base sa Pagadian City. Sa pagsuri sa YouTube channel nito nitong Linggo ng umaga, lumitaw na mayroon lamang itong wala pang 2,000 subscribers at huling na-update noong Hulyo 2024.

Dagdag pa ni Lacson, may “proper and professional way” para magkaroon ng pagpalit ng liderato sa Senado.

“The proper and professional way is to call or approach the Senate president, inform and show him the resolution signed by at least 13 senators, then the sitting Senate President resigns at the opening of the session, not through a media outlet, whether nationally recognized or obscure,” aniya.

Nitong Setyembre 8, nagkaroon ng pagbabago sa pamunuan ng Senado kung saan nahalal na Senate President si dating minority leader Vicente Sotto III.

Itinalaga naman si Lacson bilang Senate President Pro Tempore at chairman ng Senate Blue Ribbon Committee. 

Ernie Reyes nag-uulat para sa RoadNews