Alex Eala, Nasungkit ang Kanyang Unang WTA Crown sa Guadalajara
GUADALAJARA, MEXICO – Gumawa muli ng kasaysayan ang tenista ng Pilipinas na si Alex Eala matapos masungkit ang kanyang kauna-unahang WTA crown sa Guadalajara Open, isang WTA 125 tournament, sa Mexico ngayong Linggo (Setyembre 7 dito sa Pilipinas).
Tinalo ni Eala ang Hungarian na si Panna Udvardy sa isang mahigit dalawang oras at kalahating laban na nagtapos sa 1-6, 7-5, 6-3. Nagawa niyang bumawi matapos talunin ng Hungarian si Eala noong Abril sa Oeiras Ladies Open.
Naging matatag ang 20-taong-gulang na si Eala sa kabila ng mabagal na simula at pagkatalo sa unang set. Ipinakita niya ang kanyang tibay at determinasyon upang baliktarin ang laban at tuluyang maagaw ang kampeonato.
Sa kanyang landas patungo sa kampeonato, pinatumba ni Eala ang Dutch na si Arianne Hartono sa ikalawang round, sinungitan ang beteranong Amerikanong si Varvara Lepchenko sa ikatlong round, at pinulbos ang Italyana na si Nicole Fossa Huergo sa quarterfinals. Sa semifinals, dominanteng tinalo ni Eala ang Amerikanong si Kayla Day.
Ang tagumpay na ito ang naging pinakamalaking titulo sa propesyonal na karera ni Eala at nagtala sa kanya bilang kauna-unahang Pilipina na magwagi ng isang WTA title. Nagmula ito matapos ang kanyang makasaysayang pagpasok sa ikatlong round ng US Open noong nakaraang buwan, kung saan naging unang Pilipino na umabante sa main draw ng isang Grand Slam tournament sa Open Era.
Inihayag ni Eala sa isang post-match interview na, “Ito ay isang napakalaking tagumpay hindi lamang para sa akin, kundi para sa buong Pilipinas. Pinaghirapan namin ito at masayang-masaya ako na mailabas ang aking larong Pinoy sa international stage.”
Inaasahang aakyat ang ranggo ni Eala sa WTA rankings pagkatapos ng magandang performance na ito. Kasalukuyan siyang nasa 75th place sa mundo at patuloy na nagpapakita ng magandang performance sa mga internasyonal na torneo.
Ang tagumpay ni Eala sa Guadalajara ay isang makasaysayang milestone para sa Philippine tennis at isang inspirasyon para sa mga batang atleta sa bansa.
Darwell Baldos nag-uulat para sa RoadNews
