Ang Impeachment: Ang Labanan sa Likod ng Kwento ni VP Sara Duterte

SA panahon ngayon ng matinding pulitikal na pagkakahati, ang katotohanan ay tila hindi na sapat.

Sa halip na maging pundasyon ng katarungan, ang katotohanan ay madalas ginagawang kasangkapan—binabaluktot, pinipili, at ginagamit depende sa interes ng nagsasalita.

Kaya’t kung darating ang panahong haharap sa impeachment si Pangalawang Pangulong Inday Sara Duterte, huwag nating asahan na magiging simpleng usapin lamang ito ng korapsiyon o paglabag sa Saligang Batas.

Higit pa roon, ito ay magiging isang malawakang labanan ng mga naratibo—ng kung sino ang may kontrol sa kwento, at kung paano ito ilalahad sa taumbayan.

Ang bawat kampo ay may sariling bersyon ng katotohanan. May mga maglalabas ng mga dokumento, testigo, at ebidensiya —ngunit sa bawat piraso ng ‘katotohanan’; may kapalit na tanong: Sino ang nagtataguyod nito, at para kanino?

Kung may mga nagsusulong ng katarungan, may mga sasabihin ding ito’y bahagi ng isang mas malalim na plano: pampulitikang pamumwersa, paghahanda sa 2028, o simpleng paghihiganti.

Lahat ay posibleng totoo, o lahat ay maaaring kathang-isip. Ang ganitong klase ng laban ay hindi sa korte lamang nilulutas, kundi sa isip ng bawat mamamayan. Sa social media, sa radyo, sa kanto, at sa kusina ng bawat tahanan—doon talagang magaganap ang paglilitis. Hindi lang ito tanong kung sino ang nagkasala, kundi sino ang mas mahusay magkwento.

At sa dulo ng lahat, ito ay magiging SALAMIN ng ating bansa: Anong klaseng kwento ang pinipili nating paniwalaan? At sino ang may kapangyarihang ikwento ito?

Sa ganitong konteksto, ang impeachment ni Sara Duterte—kung ito man ay mangyari —ay hindi na lang simpleng ligal na usapin. Isa itong pagsubok sa ating kolektibong pag-unawa, sa ating paninindigan, at sa ating kakayahang tuklasin ang katotohanan sa gitna ng ingay ng propaganda.

Dahil sa politika ng ating panahon, ang katotohanan ay hindi basta-basta lumilitaw.

Kadalasan, ito ay natatabunan ng sigaw ng mga may impluwensiya, at naiiwan sa publiko ang mabigat na tungkuling magpasya: Alin ang totoo? At sino ang dapat paniwalaan?