‘FOR THE RECORD’ SOTTO NAGPALABAS NG SUBPOENA VS SANGKOT SA FLOOD CONTROL SCANDAL

Ni Ernie Reyes

Inihayag ni Senate President Vicente “Tito” Sotto III na kanyang nilagdaan ang ilang subpoena para sa mga indibiduwal na posibleng sangkot sa maanomalyang flood control projects.

Sa pahayag, sinabi ni Sotto na pinadadalo ang mga indibiduwal sa gaganaping pagdinig ng Senate Blue Ribbon committee sa pamumuno ni Senate President Pro-Tempore Panfilo Lacson hinggil sa multi-bilyong ghost projects sa flood control.

Naunang natuklasan ng Senado na pinakamalaking bulto ng anomalya ang nangyari sa Bulacan, saka isinabit ni dating DPWH Engineer Henry Alcantara si Senador Joel Villanueva na naunang itinanggi ang akusasyon kahit may “resibo.”

“For the record- I issued 12 Subpoenas Ad Testificandum,” ayon kay Sotto.

Kabilang sa pinadadalo ng Senado sina dating Department of Public Works and Highways Sec. Manuel Bonoan, former DPWH-National Capital Region regional director Gerald Opulencia, former Education Usec. Trygve Olaivar, former Ako Bicol Rep. Zaldy Co, at Commission on Audit commissioner Mario Lipana.

Bukod dito, pinadadalo din sina  Carleen Yap-Villa, Engr. Gerald Pacanan Engr. Arjay Domasig. Orly Guteza, Maynard Ngu, John Paul Estrada at Mark Teksay,  

Nagpalabas naman ng subpoena duces Tecum si Sotto para kay DPWH Sec Vince Dizon upang isumite ang lahat ng dokumento na may kaugnayan sa  flood control scandal kabilang ang sinasabing Cabral Files.

Inimbitahan naman si  Batangas Rep. Leandro Leviste sa pamamagitan ni  Speaker Bojie Dy.