Buhay Probinsya vs Buhay Maynila – Saan Ka Ba Talaga?
KSPHO ni Darwell Baldos
Sa totoo lang, para sa akin wala namang perpektong lugar. Kaya ang tanong ngayon ay ano ba ang mas mahalaga para sa iyo sa yugtong ito ng iyong buhay?
Isipin natin ang probinsya: Hindi ba’t nakakamiss ang simoy ng hanging walang halong usok ng sasakyan? At ang mga pagkain, hindi ba’t mas sariwa at mas mura ang gulay? Madalas libre pa dahil galing lang sa likod-bahay?
Pero teka, handa ka bang mabagal ang ang takbo ng oras? Ano ang gagawin mo kung sabado ng gabi at ang tanging libangan mo ay ang tilaok ng tandang o ang hilik ng kapitbahay? Paano kung nagkasakit ang anak mo, gaano kalayo ang pinakamalapit na hospital? Hindi ba’t doon mo mararamdaman ang bigat ng sinasabi nilang “limitado ang oportunidad”?
Ngayon, subukan nating balikan ang Maynila: Napapangiti ba tayo sa pag-alala sa karaniwang hamog na bumabalot sa lansangan tuwing umaga? O napapamura tayo sa trapik na kumakain ng tatlong oras ng ating buhay araw-araw? Totoo naman, hindi ba’t mas madaling maghanap ng raket dito?
Anumang gusto nating pag-aralan o pagkakitaan, andito lang sa mga mall o sa loob ng iyong cellphone. Pero sa gitna ng ingay ng jeep at busina, may nagsabi na ba sa atin na kahit napakaraming tao sa paligid, pakiramdam natin ay nag-iisa tayo?
Sulit ba ang malaking sweldo kung halos mapunta lang ito sa renta, pagkain, at pamasahe o gasolina sa sasakyan, habang unti-unting nauubos ang iyong ngiti dahil sa pagod?
Kaya sa tingin ko, hindi na dapat pagtalunan kung alin ang mas mahusay. Mas mainam na tanungin natin ang ating sarili: Ano ba ang kailangan ko ngayon?
Kaalaman mula kay KSPHO na maari mong paghugutan ng sagot: Kung ikaw ay bata pa, puno ng pangarap, at kayang tiisin ang sikip at usok para sa pangarap na promosyon, baka nga ang Maynila ang bagay sa iyo.
Ngunit kung ang iyong katawan ay hindi na kayang sumasabay sa ingay ng lungsod, o kung may nagaantay kang mahalaga sa buhay sa probinsya na nangangailangan ng iyong presensya, hindi ba’t ang payak na buhay probinsya ang siyang tunay na yaman?
Sa huli, hindi naman kailangan ng permanenteng sagot, hindi ba? Puwede kang kumita sa Maynila, at doon magpahinga sa probinsya. Ang mahalaga, nasaan ang iyong puso, at ang iyong natitirang lakas, sa araw na kailangan mong pumili. Saan ka ba sasaya nang hindi nasisira ang iyong sarili?
