MMDA AT DENR-NCR, NAGTULONG PARA SA REHABILITASYON NG PASIG RIVER SA PAMAMAGITAN NG ENVIRONMENTAL EDUCATION

MMDA PRESS RELEASE Hulyo 4, 2025

Pormal nang nagkasundo ang Metropolitan Manila Development Authority (MMDA) at Department of Environment and Natural Resources – National Capital Region (DENR-NCR) sa pamamagitan ng isang Memorandum of Agreement (MOA) upang paigtingin ang kooperasyon sa pag-rehabilitate ng Ilog Pasig at mga karatig na komunidad nito.

Layon ng kasunduang ito na palawakin ang public education at isulong ang sustainable transport sa pamamagitan ng mga proyektong tulad ng Dalaw Turo at Pasig River Educational Tours. Ang mga aktibidad na ito ay naglalayong: Itaguyod ang Pasig River Ferry Service (PRFS) bilang alternatibong transportasyon, Palaganapin ang kaalaman tungkol sa Pasig River Rehabilitation Program, at Makilahok ang publiko sa pagsuporta sa layunin nito.

Ayon kay MMDA Chairman Atty. Don Artes, sa mensaheng binasa ni Deputy Chairman Usec. Frisco San Juan Jr., ang kasunduang ito ay alinsunod sa adhikain ni Pangulong Ferdinand R. Marcos Jr. na “Pasig Bigyang Buhay Muli” upang maibalik ang dating ningning ng ilog.

“Nagpapasalamat tayo sa DENR-NCR sa pagsuporta sa ating mga hakbang para alagaan, pagandahin, at buhayin muli ang ilog na saksi sa kasaysayan ng ating bansa,” pahayag ni Artes.

Samantala, binanggit ni Usec. San Juan na patuloy ang pagpapaganda at pagpapalawak ng MMDA sa ferry service para mas maraming pasahero ang makasakay. Noong 2024, umabot sa 195,789 ang kabuuang pasahero ng PRFS—patunay sa patuloy na suporta ng publiko sa tanging water-based transport sa Kamaynilaan.

Ayon naman kay DENR-NCR OIC Assistant Regional Director Erlinda Daquigan, ang kasunduang ito ay isang “mahalagang hakbang para maibalik ang kalusugan ng Ilog Pasig at isulong ang sustainable urban mobility sa Metro Manila.”

“Sa pamamagitan ng environmental education at community engagement, layon naming pagbuklurin ang kamalayan at aksyon ng publiko para muling buhayin ang ilog,” pahayag ni Daquigan.

Saklaw din ng MOA ang rehabilitasyon at sustainable development ng *Manila Bay* at iba pang likas-yaman sa NCR. Parehong ahensya ang magbibigay ng *technical at administrative support* para sa matagumpay na pagpapatupad ng mga proyekto.

Sa pamamagitan ng kolaborasyong ito, inaasahang muling mabubuhay ang Ilog Pasig—mula sa isang nakalimutang tubig patungo sa simbolo ng *urban renewal at sustainable development*.

(Buboi Patriarca)