NEW YEARS RESOLUTION, SAMAHAN NG PANANAMPALATAYA, DISIPLINA, MALASAKIT SA KAPWA – Cayetano

Ni Buboi Patriarca

Hinimok ni Senate Minority Leader Alan Peter Cayetano ang mga Pilipino na gawing mas makahulugan ang kanilang mga resolusyon para sa Bagong Taon sa pamamagitan ng pagkonsulta sa Diyos at paghahanap sa Kanyang kalooban.

Ayon kay Cayetano, ang mga layuning nakabatay sa tamang intensyon at may malinaw na direksyon ay mas malamang na magtagumpay at hindi humantong sa pagkadismaya. Aniya, maraming resolusyon ang nauuwi sa pagkabigo dahil ito’y nakatuon lamang sa pansariling kagustuhan at hindi isinasaalang-alang ang mas malalim na layunin ng buhay.

Binigyang-diin ng senador na mahalagang pagsamahin ang pananampalataya, disiplina, at malasakit sa kapwa sa pagbuo ng mga plano para sa bagong taon. Para sa kanya, ang tunay na pagbabago ay nagsisimula sa loob ng tao at ginagabayan ng pananalig sa Diyos.

Sa pagsalubong sa Bagong Taon, paalala ni Cayetano sa publiko: hindi sapat ang paggawa ng resolusyon—mas mahalaga ang tamang layunin, matibay na paninindigan, at gabay ng Maykapal upang makamit ang tunay at pangmatagalang pagbabago.