SENADO MAGDEDESISYON SA IMPEACHMENT CASE SA AUG 6 KUNG TULOY O HINDI – CHIZ

Inihayag ni Senate President Francis “Chiz” Escudero na magdedesisyon ang impeachment court sa Agosto 6 kung itutuloy ang paglilitis sa articles of impeachment laban kay Vice President Sara Duterte.

Sa pahayag, sinabi ni Escudero na tatalakayin din sa plenaryo ng impeachment court ang desisyon ng Supreme Court hinggil sa petisyon na ipatigil ang impeachment trial laban kay Duterte.

Aniya, isa itong paglilinaw sa maling news report na ibinasura ng Senado ang tungkulin nito sa ilalim ng Saligang Batas na litisin sa pamamagitan ng impeachment trial si Duterte.

Noong Martes, nagsagawa ng caucus ang 24-miyembro ng Mataas na Kapulungan na inaprubahan ang pagkilos sa desisyon ng Supreme Court na nagdedeklara sa impeachment case na unconstitutional dahil nilabag nito ang  one-year bar provision sa Charter.

“The Senate decides everything as a collegial body. Someone will make a motion and if someone objects, we put it to a vote. So we’ll put this to a debate and vote on August 6 on what to do with the impeachment in light of the Supreme Court decision,”  ayon kay Senate President Escudero.

Ayon sa lider ng Senado na mapagbibigyan ng pagkakataon sa naturang panahon ang lahat ng senator-judges sa impeachment court upang suriin ang unanimous decision ng Supreme Court na kinabibilanganng 97 pahina kasama ang hiwalay na concurring opinions ng hukom.

“Yung desisyon mismo 97 pages, excluding ‘yung concurring opinions of the other members of the Supreme Court at hindi naman po lahat ay nag-aral ng abogasiya kaya kung kinakailangan, mabigyan ng konting panahon pa,” ayon sa  veteran legislator. “Ako nga humihingi rin ako ng konting panahon pa sa aking mga kasamahan kaugnay ng pagbabasa at pag-unawa dun sa desisyon bago namin igawad ang aming pagpapasya kaugnay nito,” dagdag pa nito.

Bilang abogado, ipinaliwanag ni Escudero na kailangan suriin nang Mabuti ang desisyon dahil immediately executory ito.

Sakaling maghain man ng motion for reconsideration ang Mababang Kapulungan sa Supreme Court, sinabi ni Escudero na wala silang alam kung kailan ipalalabas ang desisyon hinggil dito.

Aniya, unanimous ang desisyon ng Supreme Court at hindi base sa karanasan kaya walang posibilidad na mabaligtad ang desisyon.

“Pwede rin namang hintayin na mag-file muna ‘yung House of Representatives ng motion for reconsideration. Pero hindi pa maliwanag ‘yun. Baka mag-antay kami sa wala. At kung hinihintayin namin ‘yun, kailan na naman magpapasa ang Korte Suprema? In the meantime, anong gagawin namin? Held in abeyance? Postponed muna?” aniya.

“We cannot decide based on the mere whim of partisan people who have already taken a position either for or against. I said this at the beginning of the impeachment when it was filed last February 5, hindi ko papakinggan . . . ‘yung pabor kay VP Sara at ayaw sa impeachment at ‘yung ayaw kay VP Sara at pabor sa impeachment. I will not be cowed nor bullied by these people into acting one way or the other. We will do what we think is right,”  giit ni Senate President Escudero. 

Ernie Reyes nag-uulat para sa RoadNews