CORRUPT POLITICIANS, NEGOSYANTE SA FLOOD CONTROL PROJECT, PINAKAKASUHAN NI EJERCITO

Ni Ernie Reyes

Nanawagan si Senador JV Ejercito sa administrasyon na kasuhan at ipakulong ang sinumang indibiduwal na sangkot sa palpak at pangungurakot sa multi-bilyong flood control projects sa bansa.

Sa pahayag, sinabi ni Ejercito na dapat arestuhin kaagad ang sinumang personalidad, pulitiko man o negosyante na sangkot sa anomalya dahil lutang ang sabwatan ng opisyal ng pamahalaan at pribadong kontraktor.

Aniya, may special place ng mga taong ito sa impiyerno na nakareserba para sa kanila matapos silang makipagsabwatan sa ghost at maanomalyang   flood control projects sa bansa.

“Kailangan talagang may managot, kailangang may makulong, kasi otherwise walang magtatanda eh. I think ito ang problema ng ating bansa—walang natatakot kasi wala namang big fish na nahuhuli,” ayon sa senador.

“Kung meron man, small fries. Pero subukan niyong magpakulong ng talagang mga matataas na opisyal diyan para magtanda,” dagdag niya. 

Base sa report kamakailan, inamin ni Escudero na kaibigan at campaign donor niya ang 1 sa mga kontratistang nakakuha ng flood control projects

 “Pero si Secretary Bonoan, sa tingin ko, with his advanced age I think he wants a legacy. Pero ‘yung mga nasa baba niya, lahat ‘yan marami tayong naririnig…even the Usecs, Asecs, and director levels,” aniya. 

Noong nakaraang Lunes, ibinulgar ni Pangulong  Ferdinand ”Bongbong” Marcos  Jr. na  20% ng kabuuang P545 billion budget sa flood control projects ang nakuha ng 15 contractors.

Lima dito ang nakakuha ng proyekto sa halos lahat ng rehiyon sa buong bansa. Sa kanyang ika-apat na State of the Nation Address, nangako si Marcos na papanagutin ang sangkot sa anomalya sa flood control projects sa buong bansa.

Naunang pinabulaanan ni Escudero na sangkot siya sa anumang flood control projects sa
Sorsogon at iba pang bahagi ng bansa.

Aniya, pangunahing campaign contributor niya si Lawrence Lubiano, president ng Centerways Construction and Development Inc., sa 2022 elections.

 Narito ang mga kontratistang binanggit ni Marcos na nakakopo ng multi-bilyong kontrata sa flood control:

1. Legacy Construction Corporation
2. Alpha & Omega Gen. Contractor & Development Corp.
3. St. Timothy Construction Corporation
4. QM Builders
5. EGB Construction Corporation
6. Topnotch Catalyst Builders Inc.
7. Centerways Construction and Development Inc.
8. Sunwest, Inc.
9. Hi-Tone Construction & Development Corp.
10. Triple 8 Construction & Supply, Inc.
11. Royal Crown Monarch Construction & Supplies Corp.
12. Wawao Builders
13. MG Samidan Construction
14. L.R. Tiqui Builders, Inc.
15. Road Edge Trading & Development Services

Ernie Reyes nag-uulat para sa RoadNews