KAPOS NA BADYET SA EDUKASYON AT HEALTH CARE, PINALAGAN NI PIA

Ni Ernie Reyes

Matinding pinalagan ni Senador Pia Cayetano ang badyet na isinumite ng Palasyo para sa sektor ng edukasyon at kalusugan na hindi nakakasapat sa lumalaking pangangailangan ng mamamayan.

Sa pahayag, Hinimok ni Cayetano ang  pamahalaan na dagdagan ang pondo sa pagpapatayo ng silid-aralan, subsidiya ng estudyante, at pangunahing gamit sa ospital.

Giit niya, dapat manatiling prayoridad ang edukasyon at kalusugan sa national budget

Sa pagdinig ng Development Budget Coordination Committee (DBCC) ng Senate Committee on Finance nitong September 2, sinabi ni Cayetano, Vice Chairperson for Finance na dati na ring humawak ng education budget, na malayo ang kasalukuyang pondo sa tunay na pangangailangan ng bansa.

Tungkol sa kakulangan ng classrooms, binanggit niyang P15 bilyon lang ang inilaan noong 2023 kumpara sa P412.5 bilyon na kailangan para matugunan ang kakulangan sa loob ng anim na taon.

“P15B was a drop in the bucket compared to what we had to raise. But in any case, if you look at the completion rate, 19 percent — kakapiranggot na nga lang y’ung budget, 19 percent pa y’ung nacomplete,” sabi ni Cayetano.

Kinuwestiyon din niya kung bakit mas malaki ang pondo ng ilang imprastruktura kaysa sa edukasyon.

“P15 billion, we allocated for classrooms, ni hindi pa makumpleto. Tapos P275 billion for flood control na wala tayong pakialam. It’s so frustrating,” dagdag niya.

Binigyang diin din ni Cayetano ang pagputol sa Tertiary Education Subsidy (TES) para sa mga estudyante sa private schools, mula P30,000 bawat semester naging P10,000 na lang, dahilan para marami ang tumigil sa pag-aaral.

“That’s a big drop. The result is nagda-dropout na [ang mga estudyante.] Education is supposed to get the highest budget,” aniya.

Nanawagan din si Cayetano ng dagdag na pondo para sa medical equipment sa mga pampublikong ospital.

Hanggang ngayon, aniya, marami pa ring walang MRI, cardiac MRI, at mammogram machines.

“In the age of digital equipment, napaka basic naman na we should all understand the importance of an MRI. Kalokohan na talaga ‘tong nangyayari sa atin na ‘di natin mabudget itong mga basic na ‘to,” sabi niya.

“No less than the Constitution requires that education [should be] given the priority. And for health, kalokohan na talaga if we can’t fund the most basic needs of our hospitals,” dagdag pa ng senadora.

Ipinunto rin niya ang pangangailangang ihanay ang national budget sa Sustainable Development Goals (SDGs). Giit niya, hindi lahat ng ahensya ay gumagawa ng tamang SDG tagging.

“The budget should be aligned with achieving our Sustainable Development Goals. Some agencies do not do SDG tagging. Some are quite good at it. Maybe we can work together to get all the agencies aligned with this SDG tagging,” wika niya.

Ernie Reyes nag-uulat para sa RoadNews